డబ్బుల కోసం తండ్రిని హత్య చేసిన కుమారుడికి జీవిత ఖైదు

డబ్బుల కోసం తండ్రిని హత్య చేసిన కుమారుడికి జీవిత ఖైదు

గొడ్డలితో దాడి చేసి తండ్రిని హతమార్చిన నిందితుడికి రూ.5 వేల జరిమానా

మహబూబ్‌నగర్, సెప్టెంబర్ 25:
డబ్బుల విషయంలో తల్లిదండ్రులతో తరచూ గొడవపడుతూ కన్న తండ్రిని గొడ్డలితో దాడి చేసి హత్య చేసిన కుమారుడికి న్యాయస్థానం జీవిత ఖైదు విధించింది. మహబూబ్‌నగర్ జిల్లా రాజాపూర్ పోలీస్ స్టేషన్ పరిధిలో చోటుచేసుకున్న ఈ హత్య కేసులో నిందితుడు కవాలి నదేశ్ @ ఆనంద్కు మహబూబ్‌నగర్ ఫ్యామిలీ కోర్టు కమ్ III అడిషనల్ డిస్ట్రిక్ట్ అండ్ సెషన్స్ జడ్జి పి. ఆంజనేయులు శుక్రవారం సాధారణ జీవిత ఖైదుతో పాటు రూ.5,000 జరిమానా విధిస్తూ తీర్పు వెలువరించారు.

డబ్బుల విషయంలో తల్లిదండ్రులతో గొడవ

పోలీసుల వివరాల ప్రకారం.. 2024 సెప్టెంబర్ 19న రాత్రి రాజాపూర్ మండలం రాయపల్లి గ్రామంలో డబ్బుల విషయంలో నదేశ్ @ ఆనంద్ తన తల్లిదండ్రులతో గొడవపడ్డాడు. ఈ క్రమంలో ఆగ్రహానికి గురైన నిందితుడు తన తండ్రి కవాలి నారాయణపై గొడ్డలితో మెడపై పలుమార్లు దాడి చేశాడు.

కేకలు విన్న నారాయణ భార్య కవాలి చంద్రకళ ఇంట్లోకి వెళ్లి చూడగా, తన భర్తపై కుమారుడు గొడ్డలితో దాడి చేస్తున్నట్లు గుర్తించింది. తీవ్రంగా గాయపడిన నారాయణను కుటుంబ సభ్యులు చికిత్స కోసం జడ్చర్ల ప్రభుత్వ ఆసుపత్రికి తరలించారు. అయితే పరిస్థితి విషమించడంతో చికిత్స పొందుతూ నారాయణ మృతి చెందాడు.

ఆధారాలతో నిందితుడికి శిక్ష

ఈ ఘటనపై మృతుడి భార్య చంద్రకళ ఇచ్చిన ఫిర్యాదు మేరకు రాజాపూర్ ఎస్‌ఐ రవి కేసు నమోదు చేశారు. జడ్చర్ల రూరల్ సీఐ టి. నాగార్జున గౌడ్ ఆధ్వర్యంలో పోలీసులు దర్యాప్తు చేపట్టి, నిందితుడిపై నేరం రుజువయ్యే విధంగా ఆధారాలను సేకరించి న్యాయస్థానంలో సమర్పించారు.

తల్లిదండ్రులు కూలి పనులు చేసుకుంటూ జీవించేవారని, ఎలాంటి పని చేయకుండా ఉండే నిందితుడు డబ్బుల కోసం వారితో తరచూ గొడవపడేవాడని దర్యాప్తులో వెల్లడైనట్లు పోలీసులు తెలిపారు. ఈ నేపథ్యంలోనే తండ్రిపై దాడి చేసి హత్య చేసినట్లు పేర్కొన్నారు.

పోలీసు అధికారులకు ఎస్పీ అభినందనలు

కేసులో నిందితుడికి శిక్ష పడేలా సమర్థవంతంగా దర్యాప్తు నిర్వహించిన ఇన్వెస్టిగేషన్ ఆఫీసర్ టి. నాగార్జున గౌడ్, కేసు నమోదు చేసిన ఎస్‌ఐ రవి, ఏపీపీ కె. నరేష్ కుమార్, జె. శ్రీనివాస్ (HC-160), ఫ్యామిలీ కోర్టు లైజన్ అధికారి, CDO జె. శేఖర్, PC-2177 తదితరులను జిల్లా ఎస్పీ శ్రీమతి డి. జానకి, ఐపీఎస్ అభినందించారు.

నేరాలకు పాల్పడే వ్యక్తులకు చట్ట ప్రకారం శిక్ష పడేలా దర్యాప్తు, న్యాయ ప్రక్రియలో పోలీసు శాఖ సమన్వయంతో పనిచేస్తుందని జిల్లా ఎస్పీ పేర్కొన్నారు. నేరాల నియంత్రణతో పాటు నేరస్తులకు శిక్ష పడేలా పటిష్టమైన ఆధారాలతో కేసులను దర్యాప్తు చేసి న్యాయస్థానంలో సమర్థవంతంగా వాదనలు జరిగేలా చర్యలు తీసుకుంటున్నట్లు తెలిపారు.